BanyumasPost

Ki Manteb Sudharsono Njukut Formulir Pilkada Banyumas

  • Reporter:
  • Slasa, 22 Agustus 2017 | 17:02
  • / 29 Djulqa'dah 1438
  • Dibaca : 82 kali
Ki Manteb Sudharsono Njukut Formulir Pilkada Banyumas
Ki Manteb Sudarsono mengambil formulir Pilkada Banyumas. (Foto: Arbi Anugrah/detikcom)

BANYUMASPOST.com-Sapa sing ora paham maring dhalang kondang, Ki Manteb Sudharsono. Angger piyambeke kiprah neng panggung wayang, kue kelebu barang biyasa. Ningen angger piyambeke teka maring panggung politik, kuwe kelebu bab anyar.

 

Banjur, apa jan-jane sing dekarepena neng piyambeke bisane teka maring penjaringan cabub/cawabub Banyumas sing debukak neng PDI Perjuangan?

 

Ki Manteb Sudharsono neng dina Senen wingi (21/8/2017), njujugena putune, Juli Krisdiato, njiot formulir pendaftaran dadi bakal calon wakil Bupati Banyumas sing debukak neng PDIP. Juli Krisdianto siki njabat dadi ketua DPRD Banyumas.

 

“Inyong makili keluwarga, putune inyong, njiot formulir pendaftaran dadi calon R-2 (wakil Bupati Banyumas) utawa R-1 (Bupati Banyumas), mbuh kepriwe mengko. Ningen dheweke R-2 dhisit lah,” jere Ki Manteb neng kantor DPC PDIP Banyumas, Senin (21/8/2017).

 

Ature supaya lewih dhisit nyalon dadi wakil bupati, supayane Juli ndisitena sopan santun, tambah mateng goli politik lan bisa gawe politik sing berbudaya.

 

“Politik berbudaya kuwe ngerti sopan santun, ngerti tata krama. Putune inyong kiye esih nom, dalane esih dawa. Neng kene ana Mas Husain sing dadi Bupati, uga ana Mas Budhi (Ketua DPC PDIP), dadi kudu taat lan ngakoni. Udu ora mampu, ningen supayane dheweke ngerti wates-watese dadi wong nom,” jere Ki Manteb.

 

Juli Krisdianto dhewek ngomong lamona dina Jemuah (18/8) wingi dheweke dihubungi neng Ketua DPC PDIP Banyumas, Budhi Setiawan, lamona dheweke diolihena ndaftar bar wis koordinasi karo Ketua PDIP.

 

“Inyong olih restu sekang ketua lan uga sekang keluarga, kelebu sekang eyang. Inyong konsultasi mandan suwe karo Eyang Manteb Sudharsono, apa kiye olih nyalon apa ora. Piyambeke njaluk wektu lan njawab ‘nunggu pimpinan partaimu’. Intine, angger urung olih izin aja sepisan-pisan nyalon,” jere Juli.

 

Angger olih janji, angger mengko direkomendasi kon maju neng pertarungan Pilkada, dheweke siap nampani konsekuensi mundur sekang jabatan Ketua DPRD Banyumas.

 

 

 

 

 

 

 

 

 

Penulis Utama :Arbi Anugrah – detikNews

Editor Pelansir : Redaksi SinarBangsa

Konten ini telah melalui penyuntingan dengan tidak merubah makna berita. Konten asli dapat dilihat di sini.

Komentar

Jadilah orang pertama yang memberikan komentar!

Foto Terbaru

  • ©2017 BanyumasPost

Theme Wordpress Untuk Portal berita Professional