BanyumasPost

Asal Usule Calung Banyumas

  • Reporter:
  • Senen, 7 Agustus 2017 | 15:27
  • / 14 Djulqa'dah 1438
  • Dibaca : 367 kali
Asal Usule Calung Banyumas
Foto : http://www.ethnic-ina.com/produk/gambang-calung-banyumas

Angger crita bab alat musik, Banyumas due alat musik sing khas, yakue Calung. Sebab dene rika kelebu wong Banyumas asli, mulane kudu ngerti bab sejaraeh calung kue mau. Seliyane kena nggo pengetahuan, uga bisa nggo nambah rasa tresna maring tanah kelairan.

 

Calung kelebu alat musik tradisional perkusi sing memper gamelan, ningen digawe sekang pring. Anane calung pancen murni sekang wilayah Banyumas, dudu wilayah liyane maning. Mulane anane calung pancen kudu dijaga, aja ngantek diklaim utawane diaku-aku neng wong liya.

 

Calung lan Asal Usule

Miturut rumahulin.com, arti tembung calung yakue “carang pring wulung”. Ana uga sing ngarani calung tegese “dicacah melung-melung”.  Miturut asal-usule, sedurunge dadi calung sing kaya siki kiye, calung turunan sekang alat musik sing arane “bongkel”.

 

Bisane dearani kaya kuwe, katon pisan sekang cara gawene, nglarase, struktur komposisine, wujude, bahan bakune, tekan cara nabueh. Sekang Bongkel uga sing akhire dadi cikal bakale Angklung Jawa Barat. Angger pancen kaya kuwe, anane angklung Jawa Barat, asal-usule sekang wilayeh dewek bae, Banyumas Satria.

 

Apa kuwe “Bongkel?” Bongkel kuwe alat musik rakyat sing uga degawe sekang pring sing asale sekang Desa Gerduren, Banyumas. Alat musik kiye kelebu instrument perkusi kaya dene angklung lan nganggo laras slendro. Bongkel isine mung patang pring sing beda-beda laras/nada.

 

 

Calung lan Lengger

Jaman gemiyen nalika Islam nembe ngrembaka neng Banyumas, seni calung dionekena bareng karo anane lengger. Calung dienggo nggo nyeluk utawane ngumpulena bocah-bocah sing arep diwei ngelmu anyar yakue Islam.

Anane calung uga ora adoh sekang karakter wong Banyumas sing apa anane (blaka suta). Mulane, sekang syair-syair sing detembangena neng sindhen lan uga senggakane, ngemu teges sing apa anane. Contone bae “meneng soten atine bolar-baleran” utawa “pring wulung dilancipi” lan liya-liyane.

Alat musik calung digawe sekang pring wulung lan memper gamelan Jawa. Sing kelebu alat musik calung yakue gambang barung, gambang penerus, dhendem, kenong lan kendang. Seliyane kuwe ana gong sebul sing goli nabuh kudu disebul/didamo.

 

 

Nguri-uri Calung

Kanggo rika sing kelebu wong Banyumas, mayuh padha nguri-uri budhaya Banyumas sing aran Calung. Salah siji cara njaga supaya tetep lestari yakue mayuh padha nanggap calung Banyumasan.

 

Nganggo cara kaya kuwe, moga-moga calung tetep eksis, paling ora neng wilayeh dhewek, Banyumas. Nglestarikena kesenian calung uga kudu didhukung sekang pemrentah lan kabeh elemen masarakat liyane, kelebu inyong lan rika padha.

 

Inyong Tresna Banyumas, mayuh gendhu-gendhu rasa bab Banyumas neng group facebook BanyumasPost. Carane klik neng KENE.

 

 

 

 

 

 

 

Referensi :

http://kebudayaan.kemdikbud.go.id

https://rumahulin.com

Komentar

Jadilah orang pertama yang memberikan komentar!

Foto Terbaru

  • ©2017 BanyumasPost

Theme Wordpress Untuk Portal berita Professional