BanyumasPost

Tulung, Aja Isin Nganggo Basa Banyumasan!

  • Reporter:
  • Setu, 29 Juli 2017 | 12:04
  • / 5 Djulqa'dah 1438
  • Dibaca : 1297 kali
Tulung, Aja Isin Nganggo Basa Banyumasan!
Gambar Ilustrasi : Internet

Anane peradaban, mbuh kue neng Inggris, Prancis, Jerman, Jepang ngantek Arab, bisa diarani kuat lan diregani neng bangsa liya angger nduwe basa. Basa kuwe digunakena nggo alat utama budhaya lan uga nggo bukti lamona negara kuwe nyata-nyata beradab.

Negara-negara neng dhuwur kuwe, duwe basa mung siji. Ningen angger neng Indonesia, ora mung sepuluh, malah ngantek atusan sing kesebar neng pirang-pirang wilayah.

Jan-jane, kuwe sing kelebu aset sing ora diduweni bangsa endi bae neng nduwur bumi kiye.

Ningen nyatane, sekang pirang-pirang basa sing ana neng Indonesia, sekang 746 basa, 726 basa liyane meh ilang utawa punah (Kompas, 14 November 2007; Akung, 2011).

Sing marekna priyatin, salah siji basa sing deperkirakena arep punah malah basane dhewek, utawa sing sering dearani Basa Banyumasan.

Basa jawa dialek Banyumasan kuwe kesebar neng wilayah Kabupaten Banyumas, Cilacap, Purbalingga, Banjarnegara, Tegal, Brebes, Pemalang, bagian kulon Kebumen, ngantekan pesisir Cirebon (Indramayu)

Sing lagi desorot, generasi nom-nomane dhewek malah katon ora precaya dhiri utawa kurang bangga angger komunikasi nganggo basa Banyumasan.

Basa Banyumasan sering deanggep basa sing lucu, ngapak-ngapak, pinggiran, malah ana sing nganggep “rendahan”.

Fenomena kaya kuwe malah jane nambahih  kesan sing kurang bagus. Basa Banyumasan sering dianggep  kasar, ora bergengsi, ora sopan lan ora patut angger dienggo  neng wong-wong sing nganggep dheweke elit.

 

 

Basa Banyumasan, Basa Jawa Kuna sing Esih Asli

Ahmad Tohari (neng bukune Ade, 2009) nyritakena lamona dhiyalek Banyumasan (lan dhiyalek Tegalan), kuwe turunan asli sekang basa Jawa Kuna.

Kawit pirang-pirang abad sedurunge, basa Jawa kuna pancen didominasi vocal “a”. Beda karo basa Jawa Jogja-Solo sing didominasi vokal “o”.

Basa Jawa vocal “o” (Jogja-Solo) kuwe basa anyar sing nguja ditularena neng Kerajaan Mataram kawit akhir abad 16. Kuwe detandhai anane pasangan “taling tarung” neng aksara Jawa.

Ngrembakane basa anyar kiye, miturut Tohari, kelebu bagian sekang politik penguasaan sing delakoni Mataram neng wilayah Banyumas jaman semana.

Basa nguja dipolitisasi supayane basa Jawa anyar (vocal “o”), deanggep duwe kelas dhewek sing lewih dhuwur lan ora padha karo basa Banyumasan.

Wektu semana, basa jawa anyar (vocal “o”) dienggo neng para penguasa nggo mbedakena kelas sosial. Angger basa Jawa kuna sing  ngrembaka dadi dhiyalek Banyumasan lan Tegalan, dinggo neng para petani lan pedagang.

Sing wis genah, Basa Banyumasan utawa basane dhewek kiye jan-jane basa asli, dudu basa rendahan!

 

 

Inyong kudu kepriwe?

Anane Media BanyumasPost sing nganggo basa Banyumasan kiye, kelebu cara nggo njagani utawane nglestarikena basa Banyumasan.

Kiye uga kelebu usaha nggo nggugah wong nom-noman, utamane sing rumangsa esih cokan isin  nganggo basane dhewek.

Salah sijine, sing esih cokan nganggep basane dhewek kiye elek, kasar, ora berkelas, lan liya-liyane, ngantekan emoh nganggo.

Sebab, fakta sejarah wis mbuktikena, lamona basa Banyumasan kuwe jan-jane basa jawa “paling tua” sing wis dejaga neng wong-wong penginyongan ngantek butul siki.

Jajal, ora bangga keprimen, pokoke “Inyong Tresna Banyumas”. Mayuh nggabung neng grup fesbuk BanyumasPost, carane klik neng KENE.

 

Aja kelalen share supaya sing liya padha ngerti lamona wong penginyongan pancen duwe jati dhiri!

 

 

 

 

 

 

 

 

Penulis : KabarKebumen

Sumber : kabarkebumen.com

Tranliterasi : Redaksi BanyumasPost

 

 

Komentar

Jadilah orang pertama yang memberikan komentar!

Foto Terbaru

  • ©2017 BanyumasPost

Theme Wordpress Untuk Portal berita Professional