BanyumasPost

Fakta Sejarah : Cempulek Jebul Bank BRI Lair sekang Tanah Mendhoan Kiye

  • Reporter:
  • Jemuah, 28 Juli 2017 | 11:31
  • / 4 Djulqa'dah 1438
  • Dibaca : 3204 kali
Fakta Sejarah : Cempulek Jebul Bank BRI Lair sekang Tanah Mendhoan Kiye
Foto : Purwokerto Guidance

Redaksi BanyumasPost wis tau mbahas Bank BNI sing jebul mula bukane sekang Kabupaten Banyumas. Raden Mas Margono Djojohadikusumo, putra Banyumas, yakuwe sosok sing mbakali ngadege BNI.

 

Rika sing mikine urung kober maca, langsung bae klik neng KENE, supaya ngerti sejarah perbankan nasional sing cempulek jebul sekang Banyumas bae.

 

Nah, seliyane BNI, ana maning bank plat abang sing mesthi wis akrab karo rika padha. Tumrap wong sing manggon neng ndesa-ndesa, BRI lewih familiar tinimbang bank-bank liyane.

 

Ningen, apa rika ngerti, lamona mula bukane bank pemrentah sing aran Bank Rakyat Indonesia (BRI) uga sekang tanah mendhoan kiye?

 

Miturut merdeka.com, Bank Rakyat Indonesia (BRI) kelebu salah siji bank pemrentah paling gedhe se Indonesia. BRI ngadeg neng Purwokerto, Jawa Tengah tanggal 16 Desember 1895 nganggo jeneng “De Poerwokertosche Hulp en Spaarbank der Inlandsche Hoofden” utawa Bank Bantuan lan Simpanan Milik Kaum Priyayi Purwokerto.

 

Ngadege BRI dipandhegani neng Raden Bei Aria Wirjaatmadja. Piyambeke lahir neng Agustus 1831 neng Adireja, ibukota Kabupaten Banyumas. Neng taun 1855, nalika umure 21 tahun, piyambeken wis ngodhe dadi juru tulis kontrolir Landa neng Banjarnegara. Jabatan lan karire maju ningkat ngantekan njabat dadi Patih Purwokerto neng 1879 ngantekan tahun 1907.

 

 

 

Mula Bukane

Miturut crita, neng taun 1894, Raden Bei Aria Wirjaatmadja ngrawuih ajatan sekang salah siji guru neng wilayah Banyumas. Wektu semono, ajatan kuwe rame pisan lan diperkirkena biyayane gedhe.

 

RM Aria Wirjaatmadja (Foto : Wikipedia)

 

Cempulek jebul, biyaya sing dinggo ajatan ngantek semono gedhene, asale utang maring rentenir sing bungane gedhe pisan. Merga kuwe, Wiraatmadja krenteg atine kepengin ngadegena Bank Perkreditan Rakyat sing dadi cikal bakale BRI.

 

 

 

Bar Indonesia Merdheka

Kesebut neng Peraturan Pemerintah Nomor 1 tahun 1946 Pasal 1, lamona BRI kuwe dadi bank pemrentah pertama neng Republik Indonesia kawit jaman kamardikan.

 

Kegiyatan BRI tau mandheg sewetara, ningen diterusaken maning bar anane perjanjian Renville taun 1949. Wektu kuwe nganggo aran Bank Rakyat Indonesia Serikat.

 

Wektu semono, BRI nglebur dadi Bank Koperasi Tani dan Nelayan (BKTN) bareng karo Bank Tani Nelayan lan Nederlandsche Maatschappij (NHM) nganggo Peraturan Pemrentah Nomor 41 tahun 1960.

 

Ora ganti suwe, dhedhasar Penetapan Presiden Nomor 9 tahun 1965, BKTN diintegrasi neng Bank Indonesia dadi Bank Indonesia Urusan Koperasi Tani lan Nelayan.

 

Bar anane Undang-Undang Perbankan Nomor 7 Tahun 1992 lan Peraturan Pemrentah R.I. Nomor 21 tahun 1992 status BRI dadi perseroan terbatas kawit 1 Agustus 1992. Neng 2003, Pemrentah Indonesia adol 30% saham BRI lan resmi ganti jeneng dadi PT Bank Rakyat Indonesia (Persero) sing butul siki dadi bank pilihan nasabah.

 

Maca uga :

Kiye prawan ayu sing dadi Mbekayu Banyumas 2014

 

 

Muesem BRI

Sebab lair sekang tanah Banyumas, mulane museum BRI ya ana neng Banyumas. Apa bae sing kelebu sejarah ngadege BRI kesimpen neng musem BRI sing alamate neng Jl. Jend. Sudirman No. 57, Purwokerto.

 

 

Museum BRI (Sumber : beyoung.co.id)

 

Raden Aria Wirjaatmadja Nglayani Pelanggan (Sumber Foto : Purwokerto Guidance)

 

Museum BRI Lantai Atas (Gambar : purwokertoguidance)

 

 

Diorama (Gambar : Antara Foto)

 

 

Koleksi Ageman Aria Wirjaatmadja

 

 

Neng Museum BRI Purwokerto, akeh banget piranti sing gemiyen dienggo nggo operasional BRI. Kaya dene mesin pembukuan, pesawat tilpun, pethi wesi, lemari wesi, mesin etung dhuwit, lan liya-liyane.

 

Neng kana uga ana koleksi ageman (pakaian) lan aksesoris kagungane RA RA Wiryaatmadja. Ana uga diorama sing nggambarena suwasana bank, pasar lan liya-liyane neng jaman gemiyen.

 

 

 

Inyong Kudu Kepriwe?

Sepisan, rumangsa dadi wong Banyumas, inyong lan rika kudu ngrasa bungah utawane bangga. Sebab, sekang wilayah adhem ayem sing aran Banyumas kiye, wis lair sejarah perbankan nasional sing aran BRI lan uga BNI.

 

Kepindho, nggo aweh pengerten sing arupa ilmu pengetahuan maring anak putune inyong lan rika padha, mayuh dijak plesiran maring musem BRI Purwokerto.

 

Tujuane, supaya generasi Banyumas pengerepe, paham sejarah lan uga teyeng ngregani fakta sejarah sing lair sekang wilayaeh dhewek.  Sing ora kalah penting, uga ngerti lamona Raden Aria Wiraatmadja kuwe kelebu Pahlawan Perbankan sekang tanah mendhoan kiye.

 

Seteruse, nggo kanca-kanca sing kepengin langganan artikel banyumaspost.com lan uga kepengin dopokan karo kanca penginyongan liyane, bisa nggabung maring grup Facebook BanyumasPost neng KENE. Neng kana rika uga teyeng share apa bae sing migunani tumrap sekabehane.

 

“Inyong Tresna Banyumas”

Aja kelalen share neng media sosial nganggo hashtag #inyong tresnabanyumas supaya akeh wong penginyongan sing tresna lan uga bangga maring Banyumas Tercinta.

 

 

 

 

 

 

 

 

 

Referensi :

merdeka.com

purwokertoguidance.com

virustraveling.com

kompasiana.com

 

 

 

 

Komentar

Jadilah orang pertama yang memberikan komentar!

Foto Terbaru

  • ©2017 BanyumasPost

Theme Wordpress Untuk Portal berita Professional