BanyumasPost

Debangun Taun 1288, Mesjid neng Banyumas Kiye Kelebu Paling Tua Se-Indonesia

  • Reporter:
  • Minggu, 9 Juli 2017 | 10:46
  • / 14 Syawal 1438
  • Dibaca : 317 kali
Debangun Taun 1288, Mesjid neng Banyumas Kiye Kelebu Paling Tua Se-Indonesia
Sumber Foto : http://dinporabudpar.banyumaskab.go.id

BANYUMASPOST.com, Wangon- Salah siji peninggalan sejarah neng wilayah Banyumas sing patut ditekani yakuwe Mesjid Saka Tunggal sing manggon neng Desa Cikakak, Kecamatan Wangon, utawa 30 kilometer ngulon sekang Kota Purwokerto. Mesjid kiye kelebu bangunan cagar budaya sing dipercaya dadi salah siji mesjid paling tua se Indonesia.

Sekang pituture juru kunci Subagyo, jeneng Saka Tunggal neng mesjid kuwe sebabe saka mesjid  jumlahe mung siji. Tekan siki, saka kayu sing warnane ijo lan ana ukirane kuwe esih ngadeg neng tengah-tengah mesjid.

Neng senjabane saka detutup karo kaca sing tujuane nggo njaga supayane tetep asli. Ornamen-ornamen ukiran kaligrafi uga esih ana neng padon-padon mesjid.

“Ndhuwuran mesjid kuwe wujude memper totem 4 cewiwi. Masarakat ngkono precaya lamona patang cewiwi kuwe ngemu makna sekang falsafah Jawa, “Papat Kilblat Lima Pancer” ature, Setu (29/4).

Subagyo kelebu putu nomer 18 sekang sing gemiyen ngadegena mesjid kuwe. Dheweke crita lamona atusan taun gemiyen, mesjid kuwe didadikaken pusat dakwah lan  penyebaran Islam neng Banyumas sekang Kyai Mustolih. Pemuka agama kue disarehena neng alas mbang kulon mesjid.

Neng ukiran sing ana neng mesjid Saka Tunggal, ana tulisan mesjid kuwe dibangun taun 1288 Masehi. Sedurunge anane kejayaan kraton Majapait utawa Walisanga , kawit jaman kuwe uga bangunan utama njero mesjid ora tau diganti.

“Angger ana dina pasaran, kaya Rebo utawa Jemuah, akeh wong-wong sing ziarah maring ngeneh. Wong-wong kuwe padha aweh pangan maring kethek-kethek neng kolom mesjid. Kethek kuwe dipercaya kelebu sing tunggu wilayah tinggalane Kyai Mustolih,” jerene.

Kepala Desa Cikakak, Suyitno, matur lamona saben wulan Rajab, masarakat adat lan jamangah Mesjid Saka Tunggal kolom kono, nggelar prosesi Ganti Joro Rajab unggal taune. Prosesi kiye kelebu kegiyatan ngganti grogol pring (jaro) neng kolom mesjid.

“Angger lagi ngganti grogol, masarakat sing precaya Aboge (Alip Rebo Wage) ora kena kandhah siji karo liyane. Sing krungu mung suara pring ditugel lan digathuk-gathukena siji lan sijine,” critane dheweke.

Sing lewih maen maning, jere Suyitno, masarakat kolom mesjid Saka Tunggal meh kabeh kelebu percaya Aboge. Wong-wong kono duwe pretungan dhewek nggo nentukena 1 Sawal. Angger solat Id, khotbah nganggone basa Arab lan ora nganggo spiker nggo ngrosakena suwara.

“Para jamangah nglakoni maca takbir, ratib, tahlil lan solawatan bareng-bareng karo tabuan bedug lan terbang. Bar kuwe salam-salaman karo sekabehane,” jerene.

 

 

 

Merdeka.com

Komentar

Jadilah orang pertama yang memberikan komentar!

Foto Terbaru

  • ©2017 BanyumasPost

Theme Wordpress Untuk Portal berita Professional