BanyumasPost

Lelang Duren, Siji Ngantek Payu Rp 750ewu

  • Reporter:
  • Rebo, 5 Juli 2017 | 12:39
  • / 10 Syawal 1438
  • Dibaca : 77 kali
Lelang Duren, Siji Ngantek Payu Rp 750ewu

BANYUMASPOST.com- Ana 49 jenis duren unggulan sekang Dukuh Dirun Desa Singomerto, Kecamatan Sigaluh, Banjarnegara,  entong dilelang neng Festival Durian N’dirun tahun 2017, neng Minggu wingi (2/7).

Jenis duren Kelinci duweke Sugiono, salah siji petani sekang  Dukuh Dirun, dadi bintang sebab regane paling duwur. Duren kuwe teksture lembut, warnane kuning, kandel lan rasane legi campur pait. Mulane neng festival kuwe dilelang ngantek payu Rp 750ewu.

“Sing melu lelang ora mung sekang Banjarnegara thok, ningen ana sing sekang Jakarta, Bandung, Semarang, Tegal, Yogyakarta, Cirebon lan Purwokerto uga ana,” jere Ketua Panitia Trisno Winoto.

Acara lelang duren kelebu acara sing paling detunggu-tunggu neng pengunjung. Sebab duren sing dilelang neng kono kegolong duren lokal sing kualitase apik.

Bupati Banjarnegara, Budhi Sarwono, sing dadi juru lelang dadakan, melu aktif nawakena duren maring peserta lelang. “Sekang kasil lelang kiye kumpul dhuwit ngantek Rp 21juta lewih lan arep dibalekna maring petani sing duwe duren,” jere Trisno.

Trisno nambaih, jumlah duren sing dilelang neng festival duren taun kiye totale ana 200 duren. Kabeh wis diseleksi neng panitia, mulane dejamin kualitase.

Trisno uga nerangena lamona nggo penikmat kuliner duren, Festival Durian N’dirun kiye dadi event sing paling detunggu-tunggu neng warga utawa wisatawan sing teka maring Banjarnegara.

Wong-wong sing padha teka maring festival kiye jumlaeh lumayan akeh tur terus tambah. Seliyane lelang, sing padha teka uga disuguhi mangan duren gratis. Neng kono ana acara khusus sing jenengane “kenduri durian”.

Nggo ngramekena festival, dianakena uga bazar buah duren lan werna-werna panganan olahan duren. Anton, salah siji peserta lelang, ngakoni ora ngungun karo rega duren sing lumangyan larang sing dilelang neng festival kuwe.

Bupati Budhi Sarwono uga nduweni pengarep-arep supaya festival duren kuwe ndadikena desa wisata mandiri sing bisa ningkatena pendapatan. Khsususe nggo masarakat desa sekang sektor pariwisata.

“Akeh varietas duren lokal unggul neng Dusun Dirun kene dadi modhal utama nggo narik wisatawan, khususe wong-wong sing seneng kuliner duren neng Indonesia,” jere Budhi.

 

 

 

satelitpost.co.id

 

 

 

 

 

 

Komentar

Jadilah orang pertama yang memberikan komentar!

Foto Terbaru

  • ©2017 BanyumasPost

Theme Wordpress Untuk Portal berita Professional