BanyumasPost

Duwe Anak Prawan Gawe Stress

  • Reporter:
  • Rebo, 21 Juni 2017 | 15:18
  • / 26 Ramadhan 1438
  • Dibaca : 106 kali
Duwe Anak Prawan Gawe Stress

Assalamu ‘alaikum Kang Gendhon

Moga-moga rika sekanca padha sehat kabeh langka kendala apa-apa.

 

Langsung bae kang. Siki nyong nembe ngalami duwe anak prawan sing lagi sekolah neng SMP. Mbosa tek pikir-pikir, sue-sue inyong kayong stress.

Mikine dheweke njaluk hape sing apik, ya wis tek tukokna ngantek rega 2 juta. Ning bar-barane, malah isine dolanan hp bae, ora gelem sinau, apa maning rowang-rowang wong tuwa. Akhire, kadang-kadang inyong emosi cokan ngomeih bocah

Masalah kuwe esih mandan tek maklumi, ningen siji sing gawe nyong kesuh, angger mangkat mulih sekolah cokan dibonceng-boncengna neng bocah lanang. Malah tau, kanca-kanca liyane wis bali, tapi dheweke nembe butul ngumah mahrib, karo bocah lanang maning.

Nyong bingung mbuh kepriwe goli ngatasi kiye bocah. Nyong sebage wong tua, tetep krasa maras mbok nganti mirang-mirangena. Seliyane kuwe, inyong mandan isin karo tangga teparo, soale kayong langka bocah wadon sing mangkat mulih dejujugena bocah lanang.

 

Kaya kuwe kang, nyong njaluk saran utawa solusi nggo ngatasi masalah kiye.

 

Sumarno (Dislam) – Karangkemiri, Cilacap

 


 

Wa ‘alaikumusalam Kang Sumarno,

Amin, semeno uga sewalike, nyong melu ndongakena rika lan sekeluarga.

Carane inyong, rika goli dadi wong tuwa wis ora kurang-kurang, apa penjaluke anak, sebisa-bisa uwis deturuti.

Ningen, sing jenengane ndhidhik bocah, pancen dudu prekara gampang. Apa maning bocah-bocah seumuran semeno, biyasane lagi angel-angele.

Mula kuwe, inyong mung ngelingna, mayuh mbangun komunikasi sing lewih apik maning karo anak. Sebab, kuwe sing menurute inyong paling efektif nggo ngatasi permasalahan mau.

Rika kudu bisa njagong bareng lan crita bab apa sing jane ana neng atine bocah. Dadi ora mung kewatang aruh-aruh, ngomeih, maido ningen ora nana pendekatan sing bener-bener tekan ati.

Umpama arep ndandani prilaku sing ora bener, ora perlu dijagongena karo suwasana sing medeni. Jajal rika kudu bisa gawe kahanan sing nyenengena. Angger wis kaya kue, mengko rika bakal ngerti apa sing pancen dekarepena neng bocah.

 

Salam sukses nggo rika sekeluwarga

Kang Gendhon

 

 

Komentar

Jadilah orang pertama yang memberikan komentar!

Foto Terbaru

  • ©2017 BanyumasPost

Theme Wordpress Untuk Portal berita Professional