BanyumasPost

I Love Mendhoan Banyumas, Lhah Rika?

  • Reporter:
  • Setu, 17 Juni 2017 | 08:04
  • / 22 Ramadhan 1438
  • Dibaca : 104 kali
I Love Mendhoan Banyumas, Lhah Rika?

Mendhoan kuwe kelebu panganan khas Banyumas sing wis kewentar tekan ngendi ora. Panganan sing digawe sekang kedhele kiye pancen akeh sing seneng, apa maning angger depangan anget-anget.

Kurang lewih rong taun mbekana, jeneng ‘mendoan’ sering kesiyar neng media massa nasional. Penyebabe yakue ana juragan sing arane Fudji Wong, ndaktarena hak ciptane nggo jeneng mendoan.

Tekan siki kabar kue malah kayong amleng, ningen anane ubyug-ubyug bab mendoan neng media masa nasional wektu semono, paling ora marekena mendoan dekenal secara nasional. Wong-wong, khususe seliyane wong Banyumas, padha kepengin ngerti jan-jane mendoan kue panganan apa.

Kedadiyan kuwe mau, tetep baen ana hikmahe. Dhewek sing kelebu wong Banyumas, paling ora kudu nduweni rasa bangga maring panganan khas Banyumas sing aran mendoan.

Semena uga pemrentah, masarakat tetep ndukung supayane permasalahan hak cipta perorangan kemau ora dadi masalah maning, utamane nggo pengarepe.

 

Asal tembung “mendhoan”

Nah, inyong lan rika padha sing kelebu wong Banyumas, paling ora ya kudu ngerti bab asal-usule panganan mendoan. Sebabe, mbok ngesuk ngemben ana wong sing takon, paling ora rika wis duwe pengetahuan ora ketang sepethil.

Mendhoan kuwe asale sekang tembung, “mendho” sing maknane “setengah mateng”. Dadi mendhoan sing sebenere biyasane demasak setengah mateng (ora nganti garing pisan). Pokoke angger wis crub maring lenga, dewolak-walik sedhela langsung dientas.

Ningen ubungane karo selera, akeh penggemar mendhoan sing kepengin degawe kriuk-kriuk. Mula kuwe, bakule sok dekongkon goli nggoreng kon ngantek garing. Kabeh mau, prekara selera.

 

Goli Nyandhingena

Angger rika nguja tuku mendoan neng outlet-outlet gedhe neng kota-kota, biyasane mendhoan desandingena karo bumbu kecap. Kecap kemau decampur karo lombok cengis (rawit) sing desigar-sigar.

Anane bumbu kaya kuwe pancen gawe citarasa mendoan lewih gurih. Ningen angger mendhoan sing kesebar neng ndesa-ndesa, biyasane depangan mung cukup karo nglethus lombok cengis.

Angete tempe mendoan karo klethusane lombok cengis sing pedhes, gawe wong mangan mendoan tambah gurih baen.

 

Mendhoan sing Terkenal

Sebab dene mendhoan kue panganan khas Banyumas, paribasan unggal golong neng desa-desa mesthi ana wong dagang mendhoan.

Ningen umpamane rika kepengin nyicipi mendoan sing kewentar neng Purwokerto,  arep nggo nyuguh utawa nggo olih-olih, bisa njajal maring wilayah Sawangan, Purwokerto.

Neng kana, rika teyeng kulak mendoan semblengere. Umpama arep dinggo olih-olih, kios-kios neng kana wis nyedhiyakena widig sing degawe sekang pring nggo mbungkus. Nganggo kemasan kaya kuwe, mendoan katon lewih duwe gengsi tur patut decangking.

Mangga, rika sing tresna maring kuliner asli Banyumas, ora nana lupute niyarena mendhoan maring nganah-nganah. Sebab, salah siji sing bisa njunjug jeneng daerah kuwe ya merga kuliner khas daerah kuwe mau.

 

(red)

 

 

Komentar

Jadilah orang pertama yang memberikan komentar!

Foto Terbaru

  • ©2017 BanyumasPost

Theme Wordpress Untuk Portal berita Professional