BanyumasPost

Ngati-ati Nyebut Tembung “Koh”

  • Reporter:
  • Kemis, 15 Juni 2017 | 14:53
  • / 20 Ramadhan 1438
  • Dibaca : 191 kali
Ngati-ati Nyebut Tembung “Koh”

Tembung apa bae, angger ditambahi ‘koh’ cokan dadi ora kepenak neng kuping. Apa-apa sing mikine bagus, malah dadi ora bagus sebab mung detambaih prekara cilik ‘koh’.

Contone kaya kiye :
“Wong lanang” kuwe kelebu tembung bagus, ningen angger detambaih dadi “wong lanang-lanang koh”, uwis-uwisane kayong dadi keprimen.
Banjur tembung “kiyai”, kuwe maknane maen pisan. Ningen bareng dadi “kiyai-kiyai koh”,  jan depikir-pikir neng kuping kayong gemrebeg temen.

 

Pancen, tembung “koh” cara neng Banyumase kuwe nduweni pengaruh sing gedhe banget angger deselah neng mburine tembung sing apik. Mula, aja ngantek apa baen sing wis apik tumrap neng dhewek, dadi cacad mergane ana “koh” kue mau.

Apa maning, akeh sing ngomong jere wulan puasa kiye kelebu wulan sing paling apik. Kabeh-kabeh pada ginaon ndandani awak nganggo pirang-pirang prekara. Ana nglakoni puasa, tadarusan, sodaqoh, solat traweh, solat jamangah lan liya-liyane.

Ningen yakue, aja nganti barang-barang apik sing delakoni neng dhewek, temibane dadi cacad sebab kegandheng tembung ‘koh’. Contone :

Nglakoni puasa kuwe bagus, ningen angger awan mbengi esih dhemen nyritakena alane tanggane, akhire puasane dadi “puasa-puasa koh”

Tadarusan uga maen, ningen angger detambaih rasa pamer sebab kepengin dialem neng wong liya, akhire ya dadi “tadarus-tadarus koh”.

Sodaqoh apa maning, ora patut baguse. Ningen angger delakoni mung kepengin nggolet jeneng lan pengaleman neng ngarepe wong akeh, ya bisa uga dadi “sodaqoh-sodaqoh koh”.

Solat traweh utawane jamangah pancen bagus, ningen angger ora debarengi karo rasa welas asih maring tangga teparo, akhire ya dadi wong “solat-solat koh”.

 

Nah mula kuwe sedulur, mangga sing padha eling lan waspada. Aja nganti barang maen akhire dadi ora maen mergane detumpangi godaning syetan. Moga-moga, neng wulan suci kiye, inyong lan rika pada bisa kasil goli ginaon tapa brata.

Komentar

Jadilah orang pertama yang memberikan komentar!

Foto Terbaru

  • ©2017 BanyumasPost

Theme Wordpress Untuk Portal berita Professional